Podemos Asturies remató’l cursu políticu con una espicha popular en Noreña

El llagar La Huertina, nel conceyu de Noreña, foi l’escenariu esti sábadu a mediudía d’una espicha popular de Podemos Asturies, a poques feches yá de que la llegada del branu reduza l’actividá política. Participaron nel alcuentru dos centenares de persones procedentes del tol territoriu, llegaes na mayor parte nos autocares fletaos pa la ocasión dende Xixón, Uviéu, Avilés, Mieres y Llangréu.

Acudieron, ente otros, el secretariu xeneral y el responsable d’Organización del partíu, Daniel Ripa y Xuacu Rodríguez, respectivamente, asina como’l portavoz del Grupu Parlamentariu na Xunta Xeneral, Emilio León, y un bon númberu de diputaes y diputaos, conceyales de les candidatures d’unidá popular asturianes y miembros de los conseyos ciudadanos autonómicu y locales.

El día, soléau y calurosu, acompañó la folixa al aire llibre, nun llugar que cuntaba tamién con un espaciu de xuegos infantiles, lo que facilitó l’asistencia de families enteres. La espicha allargóse hasta bien entrada la tarde.

Nel mesmu sitiu celebrárase pela mañana l’Asamblea Social ‘Equilibriu territorial y medioambiental. Mundu rural. Alimentos con compromisu’.

Sábado, 17 Junio, 2017|