La oficialidá tuvo más respaldu que l’informe de xestión de Javier Fernández nel Congresu de la FSA

Portada » blog » La oficialidá tuvo más respaldu que l’informe de xestión de Javier Fernández nel Congresu de la FSA

La oficialidá tuvo más respaldu que l’informe de xestión de Javier Fernández nel Congresu de la FSA

Podemos Asturies quier recordar que los falantes d’asturianu, y de gallego-asturiano nel so ámbitu xeográficu, y pa exercelos en pie d’igualdá tienen que tener reconocíos los mesmos derechos llingüísticos que los falantes de cualquier llingua.

La llingua asturiana nunca foi motivu de conflictu nin representó un problema pa la xente d’Asturies. Solo la cerrazón histórica nestos últimos 40 años del PP y PSOE foi quien a nun reconocer estos derechos democráticos que nel conxuntu d’España tienen reconocíos millones de persones, y qu’ellos mesmos ponen como exemplu de convivencia.

Lluismi Orviz, responsable de Derechos Llingüísticos de Podemos Asturies recuerda que “nel marcu xurídicu constitucional recuéyese que son los propios territorios con llingua propia los que tienen que reconocer la oficialidá de la so llingua nel so estatutu d’automía”. Hasta’l momentu, la llingua asturiana ta reconocida na “Llei d’usu y promoción de la Llingua Asturiana” y na “Carta Europea de les Llingües Minoritaries”, pola UNESCO y ye una llingua viva que ve apeligrar la so supervivencia. “Ye por ello patrimoniu de tolos asturianos y asturianes, tanto de los que la falen como de los que non, y tamién, como lo son toles llingües del mundu, patrimoniu de tola humanidá”.

Según Lluismi Orviz, “nesti momentu, desque’l PSOE asturianu aprobó la selmana pasada nel so últimu congresu la incorporación de la oficialidá al so programa electoral, ábrese la oportunidá histórica de que, por primer vez, hai una mayoría suficiente pa incorporar al asturiano como lingua cooficial xunto al castellano nel marcu del nuestru estatutu d’autonomía”.

Esperamos por ello, que’l nuevu secretariu xeneral socialista asturianu, Adrián Barbón, seya consecuente colo qu’aprobó la so propia militancia y apoye los pasos necesarios pa una modificación estatutaria. “La enmienda aprobada a favor de la oficialidá tuvo un apoyu del 82%, mui superior al qu’algamó’l nuevu secretariu xeneral na so elección, un 60%, e l’informe de xestión de Javier Fernandez, que tuvo un 54%”. Y “pa ello, nun podemos esperar a que pase esta llexislatura, miles d’asturianos y asturianes lleven esperándola demasiao tiempu”.

Agora ye’l momentu, porque hai un consensu ampliu representáu por organizaciones polítiques, sindicales y sociales que, dende diferentes sensibilidaes o planteamientos ideolóxicos, toos elles coinciden en reconocer dicha oficialidá.

Yá nun valen disculpes del tipu de que nun se lleva nel programa porque, por exemplu, el PSOE nada llevaba sobre la xestación subrrogada nel so programa electoral del 2016, nel últimu congresu decidieron oponese y agora van votar en contra siendo coherentes colo aprobao en congresu. Entendemos que lo resolución aprobada’l pasáu fin de selmana respecto a la oficialidá, obliga al Grupu Parlamentariu socialista a votar a favor, y así entendemos que, Adrián Barbón-yoslo treslladará cuando se plantee dicha votación na Xunta Xeneral. De lo contrario, el nuevu Secretariu Xeneral de la FSA nun tará respetando lo aprobao mayoritariamente pola so militancia.

lunes, 9 octubre, 2017|