«Ensin independencia del Gobiernu lo que tenemos ye al raposu cuidando de les pites», diz Daniel Ripa sobre la ponencia de tresparencia

Portada » blog » «Ensin independencia del Gobiernu lo que tenemos ye al raposu cuidando de les pites», diz Daniel Ripa sobre la ponencia de tresparencia

«Ensin independencia del Gobiernu lo que tenemos ye al raposu cuidando de les pites», diz Daniel Ripa sobre la ponencia de tresparencia

«Ensin independencia del Gobiernu lo que tenemos ye al raposu cuidando de les pites, y eso ye complicao», ironizó Daniel Ripa esti martes dempués de la reunión nel Parlamentu asturianu de la ponencia del Proyectu de Llei de Tresparencia y Bon Gobiernu. El diputáu y secretariu xeneral de Podemos Asturies añadió que «yá entendemos por qué el Gobiernu de Javier Fernández yera tan roceanu a aprobar los presupuestos con nosotros, porque ello implicaba la reactivación d’una llei que previera una oficina anticorrupción independiente del Executivu. Cuando’l qu’investiga ye independiente, los resultaos son bien distintos».

«Cuando’l qu’investiga ye independiente, los resultaos son bien distintos», afirma’l secretariu xeneral tres la reunión d’esti martes

Llamentó que cola ponencia de la Llei de Tresparencia «atopamos los mesmos problemes de falta d’independencia no que cinca al Gobiernu que venimos denunciando desde va meses. Ye como si punxéramos a Luis Bárcenas al mandu de l’Axencia Tributaria o a Al Capone a revisar la so propia contabilidá. Dalgo asemeyao asocede equí, porque sobre cualesquier denuncia ye’l Gobiernu’l que decide si comienza la investigación, un órganu nomáu a deu pol Gobiernu decide si s’instrúi y la sanción al final van imponela los propios conseyeros a sí mesmos».

Daniel Ripa punxo como exemplu que si llega «una denuncia diciendo que’l Gobiernu falsea’l númberu de persones que ta nes llistes d’espera sanitaries, dalgo sobre lo qu’hai consensu social, consensu parlamentariu na comisión d’investigación, y que tol mundu sabe. Pues el conseyeru de Sanidá, el señor Del Busto, diba atopase con que’l procedimientu lo empiecen los amigotes del Conseyu de Gobiernu nomáu por Javier Fernández, la instrucción faila un órganu escoyíu a deu pol señor conseyeru de Presidencia y la sanción, si llega a habela, que diba ser raro, pondríenla tamién los compañeros de gabinete del señor conseyeru de Sanidá». Ye dicir, «quienes nieguen les llistes d’espera na sanidá asturiana diben decidir si s’investiga y si se sanciona. Nun hai que ser mui llistu pa saber cuálu diba ser el resultáu d’esa investigación». Conclúi diciendo que «diba pasar lo mesmo si falamos d’investigaciones en tresparencia de datos de contaminación o en casos de ‘puertes xiratories’».

miércoles, 31 enero, 2018|