Emilio León: «Nun puede ser que la zona rural nun cuente con escueles de cero a tres y que tampoco tenga atención pediátrica»

Portada » blog » Emilio León: «Nun puede ser que la zona rural nun cuente con escueles de cero a tres y que tampoco tenga atención pediátrica»

Emilio León: «Nun puede ser que la zona rural nun cuente con escueles de cero a tres y que tampoco tenga atención pediátrica»

«Nun puede ser qu’Asturies seya territoriu hostil pa los más pequeños, nun puede ser que la zona rural nun cuente con escueles de cero a tres años y que tampoco tenga atención pediátrica», señaló a los medios de comunicación Emilio León a les puertes del Centru de Salú de Llanes, onde esti martes participó, col diputáu Andrés Fernández Vilanova y cola diputada Paula Valero, na concentración de mas y pas pa pidir mayor atención pediátrica. El portavoz del Grupu Parlamentariu de Podemos Asturies aseguró que «nun ye de recibu que neños y neñes asturianes tengan qu’acabar en Cantabria pa recibir l’atención qu’habríen de recibir equí».

El portavoz recuerda dende Llanes que Podemos Asturies planteara na negociación presupuestaria’l refuerzu de les plantiyes

Emilio León dixo que n’Asturies «fórmense más pediatres que los que se xubilen, asina que l’argumentu principal de la Conseyería de Sanidá demuéstrase que ye falsu. Ta claro que nun quieren tratar de la mesma forma a una neña o a neñu del Oriente, d’un conceyu como Llanes, qu’a los del centru d’Uviéu, y eso nun nos paez de recibu». Y recordó que «avisáramos con tiempu de que yera necesario’l refuerzu de les plantiyes del Sespa, llevámoslo a la mesa de negociación presupuestaria y la Conseyería negábase a almitir la necesidá d’esi refuerzu. Agora nos alcontramos con que hai que reforzar la plantiya, hai que redoblar cupos y hai que dar garantíes d’atención pediátrica».

Llamentó que too esto asoceda «cuando’l Gobiernu asturianu se llena la boca falando del inviernu demográficu» y alvirtió de que «lo que tamos viendo ye qu’al final, una vez más, ábrese la vía pa les derivaciones y pa la privatización. Creemos qu’eso nun ye la garantía pa que l’atención seya igual pa tol mundu en tol territoriu asturianu».

miércoles, 24 enero, 2018|